Nova filmska adrenalinska vožnja stiže na velika platna.
Akcioni triler „Kurir – trka s vremenom“ donosi priču u kojoj svaka sekunda može da odluči između života i smrti, a glavni junaci imaju samo tri sata da završe gotovo nemoguću misiju.
Film reditelja Skota Voa od 17. septembra naći će se na redovnom bioskopskom repertoaru, a glavne uloge tumače Alan Ričson i Oven Vilson.
U centru priče je Henk Malon, bivši pripadnik elitnih vojnih jedinica i vrhunski kurir, koji dobija zadatak od kojeg zavisi život djeteta.
On ima samo tri sata da preveze organ neophodan za transplantaciju sedmogodišnjoj djevojčici.
Ono što u početku djeluje kao zahtjevan, ali jasan zadatak, ubrzo se pretvara u smrtonosnu trku s vremenom.
Vođa ozloglašene kriminalne organizacije želi da se po svaku cijenu domogne organa, pa Henk odjednom postaje meta.
Situaciju dodatno komplikuje Ben Bišop, medicinski kurir koji mu se pridružuje tokom opasne misije. Henk sada ne mora samo da stigne na vrijeme i sačuva dragocjeni organ, već i da zaštiti čovjeka koji se našao usred smrtonosnog obračuna.
Reditelj Skot Vo otkrio je da ga je scenario privukao zbog neobične kombinacije akcije, humora i emocija.
Kako je istakao, upravo su iznenađenja jedan od glavnih aduta filma, dok komedija služi kao svojevrsni začin cijeloj priči.
Ričson u filmu donosi fizičku snagu i energiju akcionog junaka, dok Vilson priči daje dozu svog prepoznatljivog humora i šarma.
Tri sata, život jednog djeteta i kriminalci koji su spremni na sve – „Kurir – trka s vremenom“ donosi borbu u kojoj nema prostora za grešku.
